Dragutin Milivoj Domjanić — Deca — Tekst

Dragutin Milivoj DomjanićDeca

Vu hladu su bili vsi puti,
Vu suncu, vu žarkomu grane,
Vse puno sadja i veselja
Vu rodne jesenske te dane.
Tam jabuke smejale nam se
Tak sladko črlene i žute
I zrele su padale same
Pred nami na steze i pute.
Mi znali smo: vse je tu naše
I bili smo srećni i mladi
I vsaku mravljicu i ticu
Od srca smo imali radi.
Tak veselo bilo se igrat.
Po stezah bez brige si iti
I onda se tiho pritajit,
Vu huti, vu grabrovoj skriti.
Prehajalo vreme je v igri
Tak naglo, da nismo nit znali,
Da poldan najenput je došel
I da su vre doma nas zvali.
A doma su bili vu brigi
I dedek je pošel k ormaru
Polahko je steklo odpiral
I vuru opipal tu staru.
On, bogec, je z rukami gledel,
Te velike oči i lepe
Vu mraku navek su mu bile,
Čez leta i leta vre slepe.
K obloku je višeput došel,
Pogledel, poslušal v dvorišće
I zazval: "Vre poldan je prešel,
Naj decu sad negdo poišće!"
Vsi išli su iskati decu,
Al deca su dobro se skrila,
Smejućki su gledela z kuta,
Vre doma pri hiži su bila.
Vu hiži se kadila juha
I kad smo mi k stolu se seli,
I sunce je došlo za nami,
Pozlatilo stol nam je celi...