Dragutin Milivoj Domjanić — Rože i jagode — Tekst

Dragutin Milivoj DomjanićRože i jagode

Ja vsakoga imam sadja,
Ja imam ti sam jagodišće,
I rad ti od vsega ja dam,
Kaj god tvoja želja si išće.
Vu cvetju je hiža mi vsa,
Na dalko te, rože je znati:
Črlene i bele kak sneg,
I vse bi ti hotel ih dati.
Ti imaš obrazec svoj bel,
Koj vredi i sela i zlata,
I vusta kak jagodah red
I s tem si bogata, bogata.
I dam ti ja hižu i vse,
Da smem ti podragati lice
I kušat ti jedenput bar
Na vustah te jagodice.