Dragutin Milivoj Domjanić — V snegu (2) — Tekst

Dragutin Milivoj DomjanićV snegu (2)

Puna mi je snega grana,
Čisto se prelama,
Puna mi je tuge duša,
Tak ti ginem sama.
Gusti sneg je put zasipal,
Rana kmica pada,
Znam, do tebe dojti more
Samo moja nada.
Tihi šum je z brezah čuti,
Glas je drobnog inja,
A ja mislim: je l se dragi
Za me kaj spominja?
Led se zbira, je l ti zima
V šancu v duge noći?
Da mi je na mojem srcu
Zgrejati te moći!
A kad zdavna v boj ste išli
V žarkom, zlatnom letu,
Vse je bilo vu veselju,
Vu dišećem cvetu.
Vnogi su nazaj vre došli,
Z tabora junaki,
Al za tebe kad ih pitam,
- Mučal mi je vsaki.
Puna mi je snega grana,
Čisto se prelama,
Puna mi je tuge duša,
Tak ja ginem sama.