Dragutin Milivoj Domjanić — Figurice — Tekst

Dragutin Milivoj DomjanićFigurice

Broj otvaranja: 2417

Dama s kavalirom,
Par iz porculana,
Svetlo se glediju
V zadnjem ognju dana.
On se nekak srami,
Ona je koketa,
Čas su predi išli
V taktu menueta.
Valjda su si šteli
Čisto malko stati
I povedat nekaj,
Kaj ni smeti znati.
On je jošće hotel
Zebrati se malo,
Ona se pogledet
Na kamin v zrcalo.
Klavesen je zaspal,
Dišala rezeda. -
Ali kaj najenput
Lica su tak bleda?
Zgasile se oči,
Ni već smeha bilo. -
To je samo sunce
Za bosket se skrilo.
Vse je v kmicu zašlo:
Park i ogenj dana.
Park je bez živlenja
Par iz porculana.




Powered by VegCook.net

© 2006-2022 cuspajz.com