Dragutin Milivoj Domjanić — Intérieur — Tekst

Dragutin Milivoj DomjanićIntérieur

Broj otvaranja: 2283

V črlenom svetlu tihi kut,
V glibokomu fotelu
Zlati se draga glavica,
Naslonjena na ruku belu.
I knjiga v svilu vezana
Iz ruke joj se skliže,
Tak rada drugda čita ju,
Al sad ju nit ne diže.
I vu kaminu z mramora
Gasi se zadnji plamen
I mrak zavija sencami
Vu črno beli kamen.
Al ona glava rudasta
Vu mehkomu fotelu
Naslonjena je još navek
Na malu ruku belu.
Ne vidi, da je mrak vre skril
Kamin, gobelin i zide,
Kaj kakva teška misel to
Za belim čelom ide?
Ne, - Snoćka bil je zadnji bal.
Još sada vals se čuje,
I kak da nečij pogled drag
Vse lice joj kušuje.
Kad kesno v noć je prešel bal,
Nî štelo joj se spati,
A kaj je potlam senjala,
To nemre nigdo znati.
A kad je bilo lepo tak.
Da nit se reć ne more,
Baš onda sunca žarkog trak
Prevlekel se čez store.
Pogladil lice, zbudil nju,
Dok oči su još spale,
- I zato ona hoće sad
Tu senju senjat dale.




Powered by VegCook.net

© 2006-2019 cuspajz.com