Učitava se... |
Kakti srebro hajda cvete,
K njoj se pašći drago dete,
Hajda jošće zrela ni
Da bi mogla žeti ti!
Čez hajdinu steza vodi,
Po njoj duša moja hodi,
Kaj ti dobro puta znaš,
Da ne zajdeš v glib i šaš?
Vre i zvezda se zažiže,
Dalko je do tvoje hiže,
Komaj joj se vidi dim,
Hodi, pucek, rajše sim.
Sim ne vidiju te mama,
Kam buš tak si išla sama,
Dojdi, dugo čekam ja,
Lepše ti je, gde su dva.
Mali, beli su oblaki,
Išće si pajdaša vsaki,
Jen se bu razišel mam -
Vidiš, to je, kad je sam.
Strašno je gizdava duša,
Ne će da me nit posluša,
Znam, kaj znamenuje to:
Drugde čeka drugi gdo!
Ali kad bu hajda zrela,
Kad buš pak se verit štela,
Bum škrljak na vuho del,
Ne bum te nit poznat štel!