Učitava se... |
Spi jalšina.
Mesečina
Tenko tkanje tke
I med breze
Riše steze,
Po njih senja pe.
Na te črne,
Oštre trne
Sipa svetli cvet,
Pak te pela
V bela sela,
V čudni tihi svet.
Samo v gori
Tam med bori
Kut je mraka pun.
Tam na malih,
Kmičnih valih
Bel se ziblje čun.
Čun se ziblje,
Sam se giblje,
Srebren mu je trag,
I kad zgine
Med jalšine,
Kaj mi je tak drag?!
Tam je bilo
Dete milo,
Koga zdavna nî,
Kaj tak zgleda,
Kaj je bleda,
Kaj me ne gledi?!
Šaš trepeće,
Mene vleče
Želja tam do nje...
Spi jalšina,
Mesečina
Mrtvo srebro tke...