Učitava se... |
Starinske si hiže z visokimi krovi
Z obločecov k cesti glediju,
Vre sunce zahaja i ideju mraki,
Pa kaj to starice ne spiju?
Na malom brežanjku nad njimi je cirkva,
Tam vsi su zazvoneli zvoni,
Al kak čudnovato i kak je žalostno,
Kaj sad pripovedaju oni.
Prošecija duga čez vulice ide,
Vuz male, starinske te hiže,
Čez grobje se gdegde zasvetile sveće:
Prošecija k cirkvi se diže.
I same su ženske i deca su drobna,
Gubiju im tenki se glasi,
Da komaj je čut litanije govorit,
I sveća za svećom se gasi.
Vre kmica je bila, kad došli su starci,
Kaj bili su čisto odzadi,
Zabadav si gledel, zabadav si čekal,
Gde naši dečaki su mladi.
A naši dečaki su dalko vu boju,
I Bog zna, gdo doma se vrne,
Tak vnogi počiva i spi si tak trdo
Na zglavju od zemljice črne.
Za onimi v boju molitva se šepće,
Za timi, kaj dalko tam spiju,
Za njimi starinske su hiže žalostne
Za njimi vsi zvoni zvoniju...