Dragutin Milivoj Domjanić — Rožnjak — Tekst

Dragutin Milivoj DomjanićRožnjak

Broj otvaranja: 1246

Vi ne zamerite, da reč mi ni tak fina,
Da ja Vam pišem tak, kak doma se spomina,
Tak mislim ja navek, ja nisem rad v paradi,
I znam, taj jezik naš Vi imate tak radi.
Vre vsikud cvete vse, to mesec došel je,
Kaj rožicah je pun, a zoveju ga Maj,
Povečte meni prav, to ime vučeno,
Nam čisto strajnsko je, je l' zmisli Vas na kaj?
Na niš! Al kad sem čul da mesec Rožnjak bu,
Ja zmislil sem se mam, kak negde roža cvete,
I kak spodobno njoj, al puno lepše još,
Vu beloj hižici je jedno drago dete.
Vuz onu hižicu se puti žuriju,
Ne smeju nigde stat, bežiju, gdo zna kam,
I nebo ih gledi, tak čisto, plavo tak,
Al lepše plavo još, neg to, ja nekaj znam.
I znam, da blizu je obločec odprt mal,
Tam negdo van gledi i nekaj premišljava.
A oči plave su kak niš na svetu ni,
I tak je draga mi ta mala, zlata glava.
I ja bi strašno rad, kaj znam, da nî mi smeti,
Tu glavicu bar čas na moje srce deti
I tiho dragati te lasi svilne, zlate...
A gdo je dete to - em, Vi to dobro znate!




Powered by VegCook.net

© 2006-2019 cuspajz.com