Učitava se... |
Vuz potok vu snegu kovačnica črna
I ogenj črleni na čase tam plane,
Vre krov se obesil i hiža je stara,
Široki ju hrast još podpira ze strane.
Odzadi zaraslo dvorišće i puno
Železa hrdjavog i čudne je kmice.
Za njim se još dale zestajeju ceste
I stišćeju hiže kak stare bogice.
A gore nad vsimi nad nebo to sivo
Kak z kamena spomen za zmirom siguren,
Kak senja od zdavna zdigava se cirkva
I s kapom okruglom široki joj turen.
Zazvonel je glas vu glibokom valu,
Vu mutnom šumu, po lugu i putu
I čul ga je vsaki i poznal ga vsaki
V palačah bogati i bogec vu kutu.
Na punoj Harmici zamučal je narod,
Polakše je počel Manduševec teći
I vsaki na čas je bil bolši neg drugda,
Jen drugomu štel nekaj lepoga reći.
I onda je narod zašumel, nagrnul
Čez vrata med kule do cirkve na bregu,
A glas se je zvona razleval vse dale
I zginul tam dalko na mehkomu snegu.