Dragutin Milivoj Domjanić — Tihi poldan — Tekst

Dragutin Milivoj DomjanićTihi poldan

Broj otvaranja: 1130

Tihi poldan kak da spi,
nigde glasa čuti ni.
Zginuli su z žita vali,
oblaki na nebu stali.
Klinčec štel bi zgoret v travi,
zvončeki sad tak su plavi.
V šumi tiči vsi mučiju,
guste grane ne šumiju.
Vse je, kak da čeka kaj:
dol i polje, breg i gaj.
A i nebo je tak čudno,
kak da nekaj senja budno.
Nekaj, kaj ni moći reći,
kaj se v tihoj ćuti sreči.
I kad veter lahki v gori
zbudil se je tam med bori,
Kak da samo dragat sme
klinčece vu travi te,
zvonček plav i klase zlate,
- onda sem ja mislil na te.




Powered by VegCook.net

© 2006-2019 cuspajz.com