Dragutin Milivoj Domjanić — V senokošah — Tekst

Dragutin Milivoj DomjanićV senokošah

Metulji letiju, kak živi su cvet,
Koj v strahu je kosi i zdigel se v svet.
Pripeklo je sunce i seno diši,
S tem teškim peharom kam žuriš se ti?
Kaj v potok k rakitam, gde gusti je hlad?
Tak tenka i slaba, pomorem ti rad.
Na stezi je vruće, tam put ti bu dug,
Ti pojdi do mene čez mehen i lug.
Sim nigdo ne vidi, tu nikoga nî,
Neg bezeg kaj cvete, diši i muči,
Počini si malko, da reč ti povem:
Na večer v trnacu kaj čekat te smem?
Metulji letiju, viš dva su po dva,
Ja nikoga nemam, tak sam sem ti ja!