Učitava se... |
Veter puše, veter zgorec,
V strahu šepće trava,
Z jabuke se drobno cvetje
Trusi, rasipava.
Si li, sever, došel zgora,
Gde su strašni boji,
Tam su vnogi naši dragi,
Tam su brati moji.
Al još negdo, al još negdo,
Kaj ni smeti znati,
Jeden, koj je meni drakši,
Neg i sami brati.
Znaš, božićnicu za njega
Najlepšu bi skrila, -
Kaj mi trusiš jabučicu?
Ne bu mi rodila!
Il ti znaš: nigdar već dragi
K meni dojt ne more,
Zato cvetje trusiš belo,
Ti, moj veter zgore?