Dragutin Milivoj Domjanić — Zdenec — Tekst

Dragutin Milivoj DomjanićZdenec

Broj otvaranja: 2540

Lipa je pri putu mam,
V hladu glibok zdenec,
Puno puc se zbira tam,
Kak od rožic venec.
Vode šum je zmirom čut,
Zajimač se vleče,
Bistra voda punoput
I zabadav teče.
Spomenik je tu navek,
Ne će da prestane,
Smeh se čuje v selo prek,
V polja i poljane.
Samo kad je tiho čas,
Lipine čez veje
Drobni i tak sladki glas
K zdencu se zaleje.
I najenput vse muči,
Samo tič popeva,
I popevka tak zvoni,
Dale se razleva.
Od popevke čudne te
Prejde smeh i šale,
Puce su žalostne vse,
Zakaj? - Ne bi znale.
Ne će se spominjat njim,
Mir bi vsaka štela,
Sad se doma pašći vsim,
Kam ih steza pela.
Steza ide koja kam,
Z desna k selu, z leva,
Ostal je slaviček sam,
Sladko si popeva...




Powered by VegCook.net

© 2006-2024 cuspajz.com